Sue ras periodesasi jabaten PERTUA ras DIAKEN ibas GBKP erpalasken TATA GEREJA GBKP, maka ilakoken me pemilihen PERTUA ras DIAKEN GBKP (Periode 2009 – 2014). Guna kiniraturen pelaksananna, Moderamen GBKP enggo ngelitken (Bimbingen) bagi si arah teruh enda :

 

1. JADWAL PEMILIHEN PERTUA/DIAKEN GBKP 2009 – 2014.

 

a. Juni – Agustus 2013 :

  1. Pengirimen Pengelayasi Moderamen.

  2. Penunjuken Team Sosialisasi Pemilihen Pertua – Diaken (BP Klasis + Team Klasis).

  3. Sosialisasi Pemilihen Pertua – Diaken (3 kali i Gereja).

  4. Doa Syafaat (Juli – Agustus 2013).

b. September 2013 s/d Desember 2013 :

  1. Pembinaan Warga Jemaat guna ngelitken Calon Pertua – Diaken (Pertua - Diaken ras kerina ngawan Perpulungen).

  • September 2013

  •  Oktober 2013

  • Nopember 2013

  1. Pembinaan ilakoken Pendeta Runggun/itunjuk BP Klasis : Pandita, Pertua – Diaken.

  2. Materi pembinaan : Pendilo jadi Pertua/Diaken – Tugas-tugas pokok Pertua/Diaken.

  3. Pembinaan si mehulina ilakoken kenca dung Kebaktian Minggu.

c. Januari – Maret 2014.

  1.  Runggun ras Team Sosialisasi ngaturken persikapen Pemilihen ras Panitia Pemilihen Pertua/Diaken.

  2. Penunjukan Panitia Pemilihan Pertua/Diaken (la banci ikut jadi Calon Pertua/Diaken).

  3. Panitia mpelajari Petunjuk Pelaksanan (Pengelayasi – Bimbingen) Pemilihen Pertua/Diaken.

  4. Ngaturken pemilihen Calon Pertua/Calon Diaken ibas Perpulungen Jabu-Jabu.

d. April 2014 : Pemilihen Calon Pertua - Diaken i PJJ/Perpulungen.

 

e. Mei 2014 :  

  • Penelitian penetapan Calon Pertua – Diaken alu mpedomani Pengelayasi (Bimbingen) kerna pemilihen Pertua-Diaken GBKP (Periode 2014 – 2019) si ipedarat Moderamen GBKP.

  • Momo/ipetandaken man Jemaat.

f. Minggu I Juni 2014 : Pemilihen Pertua – Diaken ibas Kebaktian Minggu

g. Minggu II ras III Juni 2014 : Momo Hasil Pemilihen

h. Minggu IV Juni 2014 : Penetapen Pertua – Diaken Periode 2014 – 2019.

i. Juli – Agustus 2014 : Kursus Pertua Diaken

j. Minggu I ras II September 2014 : Penangkuhen Pertua – Diaken

k. Minggu III ras IV September 2014 : Pemilihen BP Runggun

l. Awal Oktober 2014 : Pengendesen gelar-gelar Pertua – Diaken Periode  2014 – 2019 man Moderamen. 2

 

2. ERPALASKEN RAS PENANGGUNG JAWAB PEMILIHEN PERTUA RAS DIAKEN GBKP :

 

Erpalasken TATA GEREJA GBKP Bab IV Pasal 21 ayat n, maka sebagai Pelaksana ras Penanggung jawab Pemilihen PERTUA ras DIAKEN eme Runggun Gereja/Majelis Jemaat si genduari. Guna si e BP Klasis ngangkat Team Sosialisasi Pemilihan Pertua – Diaken, ras Runggun Gereja ngangkat Panitia Pelaksanan Pemilihen ibas unsur si la banci jadi calon Pertua/Diaken.

 

3. JUMLAH (BUENA) PERTUA RAS DIAKEN SI NIPILIH :

  1. Jumlah anggota Ngawan 30 KK ntah pe 100 kalak, Pertua ras Diaken buena (telu) kalak (dua Pertua ras sada Diaken).

  2. Ibas pertambahen 10 KK ntah pe 30 kalak anggota ngawan banci tambah 1 (sekalak) Pertua tah Diaken.

4. JUMLAH (BUENA) CALON PERTUA RAS DIAKEN :

 

Erpalasken Tata Gereja GBKP Bab III Pasal 14 ayat 2.b. maka si jadi Calon Pertua ras Calon Diaken jumlahna (buena) 2 (dua) kali asangken si niperluken, misalna iperluken Pertua/Diaken 3 (telu) kalak (2 Pertua ras 1 Diaken) maka Calon buena 3 x 2 + 6 kalak (4 Calon Pertua ras 2 Calon Diaken).

 

5. TATA CARA NGELITKEN CALON PERTUA RAS CALON DIAKEN :

 

          Erpalasken Tata Gereja GBKP, Bab III Pasal 14 ayat 2 eme :

  1. Calon-calon ipilih ibas PERPULUNGEN JABU-JABU setempat secara langsung, umum, bebas ras rahasia, dingen isaksiken BP RUNGGUN GEREJA ntah si mewakilisa. Calon si ersangkuten arus reh ibas Perpulungen e, janah ipindo pengakunna/kesedianna jadi Calon Pertua ntah Calon Diaken secara langsung ntah secara tertulis.

  2. BP Runggun Gereja tah si mewakilisa arus hadir ndampingi Panitia ibas pemilihen Calon, guna mereken pengelayasi (bimbingen) ras penjelasen kerna kuga ras ise kin sipatut man pilihen sue ras aturen pemilihen, erpalasken TATA GEREJA GBKP RAS PUSTAKA SIBADIA.

  3. Gelar-gelar Calon Pertua ras Calon Diaken enda ilapurken ku Sidang Runggun Gereja guna ipepayo, icakapken ras itetapken jadi Calon Pertua ras Calon Diaken GBKP (nen ayat 2.c.)

  4. Adi jumlah Calon Pertua ras Calon Diaken la seh 2 x asa sinibutuhken maka Runggun Gereja ngusulken gelah Perpulungen Jabu-jabu si bersangkuten nambahi calonna; adi e la erdalan maka Runggun Gereja nambahi calon ibas/iluar sektor/perpulungen jabu-jabu.

6. TATA CARA/PELAKSANAN PEMILIHEN PERTUA RAS DIAKEN :

 

          Erpalasken Tata Gereja GBKP Bab III Pasal 14 ayat 3 eme :

  1.  Gelar-gelar Calon Pertua bage pe Calon Diaken imomoken 2 x erturut-turut ibas Kebaktian Minggu, sekaligus ipetandaken ku tengah-tengah Perpulungen radu ras ndehara/perbulangen gelah ipetandaken/ipepayo perpulungen ras notokenca. Adi lit kalak si keberaten nandangi calon banci ipeseh man Runggun Gereja secara tertulis.

  2. Calon si la reh tupung pemilihen, banci ipilih adi lit surat si ersangkuten kerna ia berhalangen hadir.

  3. Calon si la reh tupung pemilihen alu la lit alasen si meyakinken/arah suratna, inyataken gugur (la banci ipilih).

  4. Calon-calon ndai ipilih i Gereja kenca dung Perminggun. Adi lit ibas sada Perpulungen lebih sada kali kebaktian Minggu ibas wari si e iban sekali saja.

  5. Si berhak milih eme kerina anggota ngawan ni Perpulungen eme anggota perpulungen si terdaftar jadi anggota jemaat ibas Perpulungen/Runggun setempat janah hadir ibas pemilihen e.

  6. Perhitungen suara ilakoken i Gereja ibas wari pemilihen e (kenca dung pemilihen) isaksiken anggota perpulungen seh dung perhitungen suara.

  7. Hasil pemilihen iumumken erturut-turut ibas 2 kali perminggun.

7. SYARAT-SYARAT JADI CALON PERTUA RAS CALON DIAKEN GBKP :

 

7.1.Erpalasken Tata Gereja GBKP Bab III Pasal 12 ayat 3 ras Pasal 13 ayat 3.

  1. Si banci jadi Calon Pertua ntah Calon Diaken GBKP eme Anggota Ngawan GBKP, Dilaki ntah Diberu, si enggo erumur 25 tahun janah si meganjangna 65 tahun man Calon si paksa njabat Pertua ntah Diaken, bage pe 60 tahun si meganjangna man Calon Simbaru, terhitung tanggal 31 Mei 2014.

  2. Si ersangkuten enggo jadi anggota GBKP sekurangna 2 tahun janah enggo ringan ibas daerah perpulungen setempat sekurang-kurangna 1 tahun (kecuali Pertua tah Diaken si mbaru pindah ras enggo ialoken jadi Anggota Runggun setempat).

  3.  Adi enggo ia erjabu, ia la banci erjabu dua, ntah pe ndehara sekalak perbulangen si dua ndeharana, kecuali erkiteken kematen.

  4. Si jadi Calon Pertua ras Calon Diaken la banci duana Perbulangen ras Ndehara.

  5. Ndehara ntah Perbulangen Pandita la banci jadi Calon Pertua ntah Calon Diaken.

7.2.Secara KHUSUS rikutken Kata Dibata si tersurat ibas 1 Tim.3:1-13, si jadi Calon Pertua ras Calon Diaken

      eme :

  1.  Ia arus sabar, terkuasaina dirina janah ratur kegeluhenna.

  2. Ia arus sekalak si lemah lembut dingen ngena atena kedamen.

  3.  Ia arus sekalak si tutus ras bujur, janah terteki ibas kai pe.

  4. Arus itehna ngepkep jabuna alu mehuli seh maka isi jabuna pe mehamat man bana. Adi la ia ngasup ngepkep jabuna, labo ia ngasup ngepkep perpulungen Dibata. Anak-anakna, perbulangen/ndehara tutus ku gereja ras ku perpulungen.

  5. Mehuli lagu langkahna itengah-tengah masyarakat gelah ula mecekurak ukur kalak kerna ia.

  6. Ia arus pertemue, meriah ukurna ngalo-ngalo kalak kesilang ku rumahna.

  7. Ia la banci perampang, pemabuk (peminum-minum), merangap, mata duiten tah perjudi, pengusaha prostitusi, pengedar/konsumen narkoba, rentenir.

  8. Nggit ersada arih ras temanna sapih pelayan/serayan guna ngaturken dahin Perpulungen Tuhan.

7.3. Nggit ras mejingkat makeken waktuna guna gereja ras ngasup ngaturken Perpulungen alu saber ate, gelah

       Perpulungen e terkepkep alu mehuli. Ukuren kinijingkatenna eme minimal 2 kali sebulan menghadiri

       Kebaktian Minggu, PJJ, PA Kategorial. Si sanga njabat Pertua/Diaken minimal 2 kali sebulan ngikuti

       Sermon. Emaka Pertua-Diaken si la teridah ketutusenna ibas periode si enggo lewat, la patut icalonken

       mulihi.

 

7.4. Ngikuti Pembinaan Warga Jemaat si ilakoken Pandita Runggun/itunjuk BP Klasis kenca Sosialisasi

       pemilihen Pertua/Diaken. Si la ngikuti Pembinaan la banci jadi Calon Pertua - Diaken.

 

7.5. Calon Pertua ras Calon Diaken GBKP arus kalak si sehat.

 

7.6. Pencalonen Pertua ras Diaken si paksa aktif :

  1. Pertua/Diaken periodisasi 2004 – 2009 la otomatis jadi Calon Pertua/Diaken tapi tetap ipepilihken.

  2. Pertua/Diaken si ipilih ibas penyisipen periode 2009 – 2014 tetap ipepilihken ibas periode 2009 – 2014.

  1. RUNGGUN GEREJA erbahan seleksi nandangi kerina Calon Pertua ras Diaken alu erpedoman ku bas aturen-aturen si enggo isingetken arah datas (khusus butir 7 : Syarat-syarat jadi Calon Pertua ras Diaken GBKP) rikut ras mpertimabngken keberaten-keberaten anggota Perpulungen nandangi CALON si ersangkuten, ije nari netapkenca jadi Calon Pertua ras Calon Diaken GBKP (Tata Gereja Bab III Pasal 14 ayat 2 butir c ras f).

  1. Pemilihen si la ratur ibas sada-sada Runggun rikutken Tata Gereja GBKP, banci iulangi sekali nari, si ipimpin BP Klasis si ersangkuten (bd. Tata Gereja GBKP Bab IV Pasal 24 ayat 2.h).

  1. Penangkuhen

Rikutken Tata Gereja GBKP Bab III Pasal 14 ayat 4 butir a ras b maka kerina Pertua/Diaken si bakal ikukuhken ras itangkuhken arus lebe ngikuti kerina materi Kursus/Orientasi Pertua/Diaken sue ras bahan si isikapken gerejanta. Penangkuhen/Pengukuhen itunda seh kerina materi kursus i ikutina. Bage me Pengelayasi (Bimbingen) kerna Pemilihen Pertua ras Diaken GBKP periode 2014 – 2019 ilitken ras isehken man kerina BP Klasis/Runggun/Perpulungen ras Ngawan GBKP alu erpengarapen maka si patuhi kerina aturen enda guna kiniulin perpulungen Tuhan gelah arah dahin enda pe ertambah-tambah kedewasan kinitekenta ras kemalemen ateta, sue ras visi Gerejanta, eme “Nggeluhlah bagi Kula ni Kristus”. Bujur ras mejuah-juah man banta kerina. Terpujilah gelar Tuhan arah pemilihen Pertua – Diaken Periode 2014 – 2019 enda.

Kabanjahe, 11 Juni 2013

MODERAMEN GEREJA BATAK KARO PROTESTAN

Ketua Umum,                                                            Sekretaris Umum,

(Pdt.M.P.Barus,MTh )                                            (Pdt.Simon Tarigan,STh)